Deu 33 | MEU | STEP | Bena Dirava ena hesiai tauna Mose ese Israel taudia e hanamodia, ia do se mase negana ai. Ena hahenamo herevadia bini.

Deuteronomy 33

1 Bena Dirava ena hesiai tauna Mose ese Israel taudia e hanamodia, ia do se mase negana ai. Ena hahenamo herevadia bini. 2 Ia eto:

Iehova na Sinai amo ema,
Seiri amo e tata dae roha idia latadiai;
Paran ororona amo e tara,
Helaḡa taudia gerebu gerebu edia amo ema;
Taravatu na lahi na heto, ia imana idibana ai.
3 Oibe, ena orea taudia e lalokau henidia,
Ena helaḡa taudia iboudiai na ia imana ai.
Oi aemu gabudia ai e rakava,
Haheḡani emu amo e abiva.
4 Mose ese taravatu e henida,
Iakob ena bese ahuna ai bainela ḡauna.
5 Iehova na Iesurunu pavapavana ai ela,
Bese ikwaradia taudia e hegogova negana ai,
Bona Israel iduhudia iboudiai e hebouva negana ai.
6 Ruben baine mauri, basine mase;

Ena orea taudia danu basie gadoi.
7 Iuda be ini e herevalaia toma:

Iehova e, Iuda gadona a kamonai;
Ena orea taudia ida ba haheboudia;
Oi imamu ese bae durua,
Ia inaina imadia amo ba hamauria.
8 Levi be ini e herevalaia toma:

Emu Tumim bona emu Urim, ^{▼▼Tumim bona Urim na mari nadidia rua.}
Emu helaḡa tauna ba henia;
Masa ai o dibaḡania,
Meriba ranu gabudia ai o heai henia.
9 Ia ese tamana bona sinana e herevalaidia, eto
“Asina lalodiamu”;
Tadikakana e dadaraidia,
Bona natuna e lalodia nege;
Badina be idia ese emu hereva e kamonai,
Bona emu taravatu e badinadia.
10 Idia ese emu haheḡani na Iakob bae hadibalaia,
Emu taravatu na Israel bae hadibalaia.
Idia ese muramura mai bonadia na oi vairamu ai bae gabua,
Ḡole-oho bouboudia na oiemu ihaboulaina patana latanai bae haḡole oho.
11 Iehova e, ena kohu ba hanamoa;
Imana ḡaukaradia bavabi dae.
E tuari heniamu taudia ba gwadadia,
E dainai heniamu taudia ba gwadadia mase,
Basie tore isi lou.

12 Beniamina be ini e herevalaia toma:

Iehova ena lalokau na
Ia badibadinai e nohomu mai namona ida.
Dina Idoinai ia ese e ḡeḡe ahumu,
Ia paḡana padadiai ena noho gabuna e karaiamu.
13 Iosef be ini e herevalaia toma:

Iehova ese ena tano baine hanamoa,
Guba atai ai ena kohu namodia amo,
Dobu gabudia tanobada henunai edia ḡau namodia amo,
14 Dina ena huahua namodia amo,
Hua ta ta anidia namodia amo,
15 Ororo gunadia edia ḡau hereadia amo,
Mia-hanaihanai ororodia edia ḡau loḡora amo,
16 Tano ena ḡau namodia mai anidia idoidiai amo,
Bona au ginigini ai e nohova Diravana ^{▼▼Au ginigini ai na nohova Diravana: Esodo Karoa 3 ba itaia.} ena hahenamo amo.
Iboudiai na Iosef kwarana ai bae kau.
Tadikakana e halohiadia tauna tubuana ai bae kau.
17 Ena boromakau natuna maruanena roboana na herea dae;
Doana na uda boromakauna doana na heto;
Doana amo taunimanima iboudiai baine nuadia
Baine nuadia ela bona tanobada dokodia;
Efraim ena gerebu gerebu ese,
Bona Manase ena daha daha ese.
18 Sebulun be ini e herevalaia toma:

Sebulun e, emu raka lasi ai ba moale;
Isakara e, emu kone noho ai ba moale.
19 Taunimanima bae boiridia, edia ororo baela,
Unuseni ai kara maoromaoro bouboudia bae hahelaḡadia;
Badina be davara ena taḡa bae haboua,
Bona kone ena kohu hehunidia bae gogo.
20 Gad be ini e herevalaia toma:

Gad ena tano e habadaiamu tauna na namo.
Ia na leona na heto e hekuremu,
Imana e dareamu, bona kwarana tubuana.
21 Tano namona ia ese e abia hidi, iena,
Badina be lohia ahuna bunai.
Bese ikwaradia taudia dekediai ema,
Iehova ena kara maoromaoro e hahemaorolaia,
Ena hahemaoro na Israel taudia latadiai e gwaurai.
22 Dan be ini e herevalaia toma:

Dan na leona natuna,
Basan amo e roho lasimu.

23 Napatali be ini e herevalaia toma:

Napatali e, lalonamo vada o abia,
Iehova ena hahenamo vada o abia vaitani;
Gohu bona diho kahana bavabi.
24 Asere be ini e herevalaia toma:

Asere na mero namo-hereana;
Tadikakana ese bae imodaia.
Aena na dehoro ai bae uru diho.
25 Emu tamaka na auri bona auri labora-laborana;
Emu goada na emu mauri dinadia ida bae heḡereḡere.
26 Iesurunu o, Dirava na asi idaina.
Ia na guba oridia ai e guimu, oi idurumu totona:
Ia na guba amo e maimu, mai hairaina ida.
27 Noho-hanaihanai Diravana na emu noho gabuna;
Mia-hanaihanai imadia na henumu ai.
Inaimu na vairamu ai e luludia,
Eto “A habuadia tari”.
28 Taunabunai Israel na e noho namonamova,
Iakob ena ranu gabuna e miava,
Uit bona vine ranuna tanona ai;
Oibe, hunu na guba amo baine diho ena tano ai.
29 Israel e, oi na namo. Daika na oi sisivamu?
Iehova ese vada e hamauria besena;
Emu hekaha kesina,
Bona emu kwalimu darena.
Inaimu na vairamu ai bae goru diho;
Edia atai gabudia helaḡadia ba moidia tao.